Sur da nus

Il Survetsch logopedic Surselva porscha terapia logopedica el sectur avon la scoletta/scola obligatoria, el sectur dalla scola regulara e speciala ed el sectur postobligatori el center da terapia a Glion ed allas staziuns externas. Las persunas dil fatg per logopedia ein suttamessas allas directivas dil dossier da qualitad Logopedia GR che reglescha ils fatgs specialisai e formals.

La tschaffada logopedica en scoletta ei in instrument approbau per eruir ad uras singularadads linguisticas. Cheutras san ins sefatschentar baul cun quellas e minimar il cuoz dalla terapia. En Surselva succeda quei cun agid dil principi da quater egls. La mussadra observa ils affons en scoletta ed annunzia per tschaffar quels affons, tier ils quals ella ha constatau malsegirtads linguisticas ni tier ils quals ella recamonda in giudicament dalla logopeda. En tut las scolettas dalla Surselva tschaffa ina logopeda ils affons annunziai aschia. Quella tschaffada cuoza circa 10 minutas per affon e lubescha alla logopeda da giudicar il livel linguistic digl affon corrispundent e da decider, sch’ella recamondi ina diagnostica logopedica extendida, sche cussegliaziuns fussien gideivlas ed ins dueigi vinavon observar l’acquistaziun dil lungatg digl affon ni sch’igl affon muossi buca singularadads logopedicas.