Suenter la finiziun dalla scolaziun dalla scola media propedeutica dat ei la pusseivladad da far la maturitad specialisada el camp professiunal giavischau sanadad ni pedagogia. Las pretensiuns supplementaras ein differentas da camp tier camp. 

Per aquistar la maturitad specialisada sanadad drova ei in practicum accumpignaus da silmeins 24 jamnas en in'instituziun da sanadad. Plinavon ei da scriver ina lavur da maturitad e presentar quella. 

Per la maturitad specialisada pedagogia vegn instruiu ein in bloc da scolaziun da 15 jamnas ils roms generals da formaziun (lungatgs, matematica, scienzias naturalas, scienzias humanas e socialas). Plinavon ei da scriver e presentar ina lavur da maturitad specialisada.

La maturitad specialisada possibilitescha igl access ad ina scol'aulta dil fatg culla finiziun da bachelor ni master. La maturitad specialisada ei acceptada sco criteri d'access. Ella arva era la porta alla schinumnada passarella, in examen supplementar alla maturitad specialisada ni maturitad professiunala. Tgi che contonscha quella ha access a tut ils studis dallas scolas aultas universitaras dalla Svizra (universitads ni ETH).